'மார்கழியில் மக்களிசை' தனது ஐந்தாம் ஆண்டை நிறைவு செய்திருக்கிறது. சங்கீத சபாக்களில் நிரம்பி வழியும் சாதிய கலை நிகழ்வுகளுக்கு எதிர்க்குரலாய் எழுந்து எளிய தமிழ் மக்களின் கலை இசை வடிவங்களை மக்கள் மன்றத்தில் ஐந்தாண்டுகளாய் அரங்கேற்றி வருகிறது நீலம் பண்பாட்டு இயக்கம். இது எளிய காரியமன்று. இயக்குனர், தோழர் பா.ரஞ்சித்தின் இந்த கலகக்குரல் தனித்துவமாக சென்னையில் ஆண்டுதோறும் நிகழ்த்தப்படுகிறது. அவரும், அவரது தோழமைகளும் பெரும் உழைப்பையும், அர்ப்பணிப்பையும் செலுத்தி இந்நிகழ்வை நடத்தி வருகிறார்கள். இந்நிகழ்வின் அரசியல் தன்மை மிக முக்கியமானது. பார்ப்பனீய கலை மேட்டிமைத்தன்மையை கேள்விக்குள்ளாக்கும் உழைக்கும் மக்களின் இசை வடிவங்களுக்கான மேடையை அமைத்து கொடுத்���ிருக்கிறது நீலம். தமிழ்நாடெங்கும் தேடித்தேடி கலைஞர்களை மேடையேற்றுவதன் மூலம், வழக்கொழிந்து வரும் சில நாட்டார் கலை வடிவங்களுக்கு உயிரூற்றியிருக்கிறார் ரஞ்சித். வேறெந்த கலை வடிவங்களைக்காட்டிலும் 'இசை' சாமானியர்களின் எளிய கலை வடிவம். இதன் மூலம் அவர்கள் வெளிப்படுத்தும் கலை நுணுக்கம், கலைத்திறமை என்பது மட்டுமல்லாமல் தமது போராட்ட வாழ்வியல், பண்பாட்டு தெறிப்புகள், சுரண்டலுக்கு எதிரான போர்க்குரல், சமூக அடக்குமுறை குறித்த உணர்வுப்பூர்வமான வெடிப்புகள் என எளியமக்களின் இசை இம்மண்ணின் நீண்ட சமூக-அரசியல் வரலாற்றின் பதிவு. இவற்றை நவீன வடிவங்களில், உயர்தரமான மேடை வடிவங்களில், சர்வதேச தரமான ஒலி-ஒளி அமைப்புகளோடு இக்கலைஞர்களை மேடையேற்றுகிறார் ரஞ்சித். சங்கீத சபாக்களின் பாரம்பரியமெனும் பார்ப்பனீய பண்பாட்டு சூழலை உடைத்து மக்கள் இசையை நவீனத்துவத்திற்குள் அழைத்துவருகிறது நீலம். அரங்கமெங்கும் இளைஞர்களின் உற்சாகக் குரல்கள் கிராமிய கலைஞர்களுக்கு புதிய அரங்கு அனுபவத்தையும், உற்சாகத்தையும் அளிக்கிறது. அரசு நிர்வாகங்கள், பெருமுதலாளிகளின் ஆதரவின்றி சகதோழமைகளின் அயராத உழைப்பினையும், அரசியல் கலகத்தையும் மூலதனமாகக் கொண்டு நடந்து வரும் 'மார்கழியில் மக்களிசை' என்பது தமிழின பண்பாட்டு எழுச்சிக்கு பெரும் நம்பிக்கை. தமிழ் சமூகத்தில் எழும் மாற்று, புதிய பண்பாட்டு அரசியல் , சமூக நிகழ்வுகளை கலை இலக்கிய-படைப்புலகமும், பெரும்பான்மையான அறிவுச் சமூகமும் தனது மெளனங்களின் மூலம் நிராகரித்தே வந்திருக்கிறது. கலை-இலக்கியத்திலிருந்து அரசியல்-நீக்கம் செய்யவேண்டுமெனும் பார்ப்பனிய விமர்சன அரசியலின் நீட்சி இது. இவ்வாறாக நிராகரிக்கப்படும் நிகழ்வுகளே தமிழினத்தின் திசைவழியை முடிவு செய்வதாக அமைந்தும் இருக்கின்றன என்பதே வரலாறு. சிறுபத்திரிக்கைகளின் அரசியலாக எழுந்த அரசியலற்ற-கலையுலகம் எனும் தாக்குதலை உடைத்து பண்பாட்டு அரசியல் நிகழ்வுகளை வெற்றிகரமாக முன்னகர்த்துவதே இந்த பார்ப்பனீய அரசியலுக்கான எதிர்வினையாகும். மார்கழியில் மக்களிசை பொதுவெளி விவாதத்திற்கு உட்படுத்தப்பட்டு வரவேற்கப்பட வேண்டும். இதை இலக்கிய ஜாம்பவான்களோ, அறிவுலக மேதைகளோ செய்வதில்லை. இவற்றை முறியடித்து மக்களிசை வெல்லும் என நம்பிக்கை எனக்குண்டு. மூன்றாம் நிகழ்வில் ஈழத்து பாடகர்களை, கலைஞர்களை மேடையேற்றி அவர்களுக்கு மரியாதை செலுத்தும் வாய்ப்பை நீலம் தோழர்கள் அளித்திருந்தனர். தமது அற்புதமான குரலில், பொருள்பொதிந்த பாடல்களை பதிவு செய்த ஈழத்து பாடகர்கள் பெரும் நம்பிக்கையையும், உற்சாகத்தையும் கொடுத்தனர். இதுபோல கலைஞர்களை உலகமெங்கும் தேடி மேடையேற்றிட அயராது உழைத்திடும் நீலம் தோழர்களுக்கும், தோழர் பா.ரஞ்சித் அவர்களுக்கும் எனது அன்பையும், மகிழ்ச்சியையும், வாழ்த்துகளையும் பதிவு செய்கிறேன் @beemji @Neelam_Culture @NeelamSocial