الهوى صلف و ضلوع الهواوي عواري كل ما هَب جا يلحَق شهيقه زفيره لو يعوّل على الصده حدود و مذاري وش يفكه من الذكرى لجت تستثيره تارك أقصى الوكاد وماخذ أدنى المحاري ومتعشّم سرابٍ ما يوديه ديره لايمه، خل عنك اللوم، مالك مجاري ميّت الصب أعمى عين و أعمى بصيرة الحجج واهية بـ درايته، لو داري ما رخص عمره اللي له على شان غيره المحبة ثمانٍ ضاحكات و عباري تاخذ الأولى وتجيك معها الأخيرة بين غمز الطيوف وبين همز الطواري كل دربٍ على النسيان مأخوذ خيره شِب يا قلب، دام الليل ما هو بساري لين تلحق على صلوا الصغيرة كبيرة كل الآلام و أضعاف التعب والعزاري فدوة اللي ما قَفّى لين واجه مصيره ناحلٍ وين ما هبّت هبوب الذواري يتمايل قوامه و يتطاير حريره ماخذٍ من بنات الريح زول و مواري و متشكّل من الغيمة خصال و سريرة لا عيونه رصاص ولا رموشه شباري ما مثل “عينه ورمشه” “خطير وخطيرة” من يشوفه يشوف الصبح ليلٍ غدّاري خل من ذاق فاكهته وهام بعبيره وَجْد روحي، يا ليت إني على البعد ضاري كان ما ذاب قلبي بالرحى المستديرة راح و أنا أتمالك طيحتي و انكساري تحت ليلٍ ما جاب لنية الوصل سيرة كيف من عقب ما كانت دياره دياري اختفى كن ما هو وسط شبه الجزيرة ما أصعب من الوصال إلا الصبر و أنتظاري الله يجيرني في البعد، والله يجيره له علي أذكره بين السهر و المساري ولي عليه إن سمح ظرفه يحكم ضميره لا يصدق لقالوا الحب بايع و شاري و الغلا في صميم القلب ما طار طيره