بخصوص موضوع تأليف المواقف عشان الضحك و الهزار لسه قاري حديث خوفت بصراحة لما شوفته قال صلى الله عليه وسلم"ويلٌ للذي يحدِّثُ بالحديثِ ليُضحكَ به القومَ فيكذبُ ويلٌ له ويلٌ له " لما جيت اتأكد منه لقيته في الترمذي و أبو داوود والنسائي أحمد ف ناخد بالنا يجماعة بعد كده 🤍🤍
فيه دعاء بقوله قبل النوم لما احس مش جايلي نوم او ارق وانا ع السرير وبنام بعدها على طول
"اللّهُمَّ غارت النجوم وهدأت العيون وأنت حيٌّ قيوم لا تأخذك سنةّ ولا نوم ..اللَّهُمَّ أهدِ ليلي و أَنِمْ عيني"
الجو حر ومش قادر أعمل حاجة ❌
لا إلَه إلَّا اللَّهُ ما أشدَّ حرَّ هذا اليومِ اللَّهمَّ أجرني من حرِّ جَهنَّم✅
يقول الله_ عز وجل لجهنم _"إن عبدًا من عبادي استجارني منك وإني أشهدك أني قد آجرته"🤍
بسمع كتير عن ناس فرحانة بإنجاز أنها خرجت من الكلية سليمة نفسيًا الحقيقة لو هقدم نصيحة بعد تلت سنين ونص في الكلية هي أنه مفيش حاجة تستاهل تبانيك علشانها وكل ما كانت دماغك صافية هتقدر تهندل الوضع أيًا كان وكل إلي في إيدك وبتقدمه بتؤجر عليه مفيش حاجة تستاهل تلغي كيانك ووجودك مقابلها
مننساش يشباب أنه اصلا ربنا اتكلم عن اليوم ده فبلاش نكون جزء منه
"تكاد السماوات يتفطرن منه وتنشق الأرض وتخر الجبال هدَّاً (أن دعوا للرحمَٰن ولدا)"
الحمد لله على نعمة الإسلام وكفيٰ بها نعمة ♥️♥️
أول مرة أعرف النتيجة العظيمة ديه ف الحديث ده
"من أكل طعاماً وقال الحمد لله الذي أطعمني هذا ورزقني إياه من غير حول مني ولا قوة غفر له ما تقدم من ذنبه ومن لبس ثوباً و قال الحمد لله الذي كساني هذا ورزقني من غير حول مني ولا قوة غفر له ما تقدم من ذنبه"
مش من عادتي اتكلم عن امتحان خلصته او اتكلم عن الكلية عامة الا لو بهزار يعني
بس انا لاحظت المفارقة الغريبة اني الاقي اسئلة اناتومي مخرجتش برا مراجعة دكتور مدحت (مذاكرتها ما تاخدش ساعتين)
بعدها ع طول اسئلة فارما مش عارفين نحط فيها قلم بعد ما ذاكرنا وسمعنا ناس يوتيوب وحلينا
بس!!!
على طول كنت بقول فيه مبالغة في حوار الطب وازاي بيأثر على حياتك لحد ما النهاردة صاحي قلقان (كالعادة) خايف أكون نمت زيادة عن اللزوم عشان ورايا حاجات كتير لحد ما افتكرت حوار الإجازة فجأة حسيت براحة وفرحة ورجعت نمت
هو ده حلو بس شئ محزن خصوصًا وإحنا لسه في الأول
بحس اني لما اذاكر بيبقي ليا قيمة بحس اني عملت واجبي ومش عايش ع الفاضي نفس الفكرة لما اوضح لحد مش فاهم حاجة مذاكرها ببقي فرحان جدا اني بعمل حاجة مفيدة ولا لما اشوف تحليل لحد واقوله فيه ايه ويعمل ايه ..حاجات بسيطة بس بتغير مودك لما تحس انك عامل الي عليك ♥️
أقولكم على حاجة
العيال بتوع طب بيكبروا الحوار ومحسسيني أنهم لازم يبقوا تنانين مجنحة عشان يقدروا يجاروا الحوار وهما أصلا أغلب الوقت مقضيينه سوشيال ميديا وتضييع وقت وصيوحين على الفاضي
الطب ده سهل علي فكره بس
مش عايز حد عنده اخوات ولا اصحاب ولا حياه ولا بيجيله نوم ولا بيجيله فقدان شغف ولا بينهار فيحتاج يبطل يزاكر
هو عايز بني ادم مفرغ تماما ليه
للاسف للاسف يعني البني ادم ده مش انا لسه مكتشفه ده اليومين دول ..
عايز أفهم حوار أنه لو إلي بيصورك بيحبك الصور بتطلع أحلي ؟!
هو مين مش بيحبك يمعلم هيستحمل كل الوضعيات ديه والهوس بتاعك كل ما تشوف صورة منهم تقول وحشة !
متحطش العواطف في كل حاجة في حياتك
هي مهارة يسطا والله مش حاجة تانية
الحَزَن إلي بييجي عليك من وقت للتاني طبيعي عايز اقولك أن أهل الجنة كان جزء من حياتهم... أول دعاء قالوه لما دخلوا الجنة "وقالوا الحمد لله الذي أذهب عنا الحَزَن" وأصاب الرسول (ص) .. كان بيردد الدعاء"اللهم إنا نعوذ بك من الهَمِّ و الحَزَن"هي الفكرة كن على يقين أنه تكفير عن سيئاتك
عشان بس نبقي متفقين الشات ده اسوأ تواصل ممكن يكون بين البشر ما بين مشاعر كدابة ودس سم ف العسل غير انه بيزود جبن ناس فبيخليها تقول رأيها من وراه ف نفس الوقت مبيبقاش ليهم أي كلمة او موقف ف الحياة الحقيقية علماء النفس بيقولوا نبرة الصوت ممكن تخليك تحلل الشخص الي قدامك في ثواني
﴿ وَاذْكُر ربّكَ إِذَا نَسِيتَ ﴾
- سُبحان الله
- الحمدلله
- الله أكبّر
- أستغفر الله
- لا اله الا الله
- لاحول ولا قوة الا بالله
- سُبحان الله وبحمده ، سُبحان الله العظيم
- اللَّهُمَّ صلِّ وسلِم على نبينا محمد .
معرفش حد ممكن يتفق معايا ولا لأ بس أنا بحب الناس إلي حواليا تحسسني أنها بتحبني أو بتخاف على زعلي ويبقى فيه حماس في أي كلام بينا مش جو ال اشطا عادي و شغل ايه الأخبار وربنا يوفقك والحوار ده اعتقد ده الفارق في العلاقات إلي بتكمل لفترات طويلة الحماس إلي بيفضل موجود في كل مرة
مش عارف الي هقوله ده ويرد ولا لا بس لما بقيت اروح اعمل شاي بقيت بحس بخنقة وضيق اتمني ميكونش ارتباط مفهوم اني ابدأ اذاكر بإني اعمل شاي يأثر عليا بالطريقة ديه لأني وقتها هزعل ان الكلية عملت فيا كده واحنا لسه ف الاول!!!
لا أخفيكم سرا والله بس الواحد زعلان على نفسه من الحاجات الي بقي يهتم بيها ويعرف بعد كده قد ايه هي تافهة وملهاش قيمة من فرص بتضيع منه ومازالت وهو واقف يتفرج عليها... اللهم نور بصيرتنا وافتح لنا طريق الخير وابعد عنا ما لا يرضيك
عرفت انه لما بطلت تعرض أفكارك ع الناس بقت تنجح ؟!
طب عرفت لما تستخدم لسانك بحكمة حالك اتغير ازاي ؟ و مبقاش عندك يأس!!
امتي عرفت انك لما تشارك الناس ف كل حال هما فيه سواء فرح او حزن مش لازم يردولك ده وانك لازم تبقي قوي لوحدك؟!
بيتهيألي انك عارف ان محدش عايزك احسن منه ♥️