ريانة العود ميلي مع هوى القلب الهواوي كثر المحاذير لا ذا وقتها ولا زمنها الحب لو ما نعيشه واقع نعيشه مناوي "ملاذ الأرواح" تفتن به لو أنه ما فتنها ما جيت أخيّرك جيتك حاذفٍ عمري فداوي والله لو سنيني تقفي سدى و أدفع ثمنها شلون ما أطيح مع لفحة نسايمك متساوي و أنا عيونك ، لو أن ما مت فيها مت منها مِن علّم الرمش لا يطعن إذا ماهو مداوي ما علمه كيف حال اللي على فاله طعنها فلي جديلك يزول الريب وتهون الدعاوي ونبشر الشمس عن صدق الخبر و نرد عنها على عيونٍ ماهي عين الظبي ولا النداوي ولا بياضٍ ماهو فـ الويضحان ولا لبنها القلب وادي وجرعات الولع سيلٍ نحاوي يزهر، ويجرف نحاه النفس ويقطّع رسنها ما بين وبل الغلا وملاهب الشوق السناوي تكوسري للصبابة كل ما جرّت لحنها ودي على آخذك للقمرا وللنجم السماوي أحيي شعورك و ألبس سالف ظنونك كفنها من قبل لا تولد الفرقا من بطون البلاوي وتهد غفلة بيوت الحب وتشتت ضعنها دام القلوب فـ بعض متعلقة عطف و رجاوي لا تتركين المكابر بينا يآمر وينها خايف يروح الزمان و تصغر كبار الهقاوي و أسمح،وأنا لاسمحت تشين نفسي من بدنها تجودي في عراوي الوصل لو ماله عراوي جابتك الأيام ، و الأيام ما حيٍ ضمنها