الحمد لله على الوحش قبل الحلو الحمد لله على التعب قبل الراحة الحمد لله على كل حاجة كنا فاكرينها النهاية وتخطيناها عادى بفضل ربنا وبفضله بردو هنتخطى كل اللى بيحصل دلوقتي
اللهم لك الحمد حمد كثيرا كما ينبغى لجلال وجهك وعظيم سلطانك
بواجه عواقب أفعالى على حاجات عملتها من 7 سنين خلتنى اخد قرار غلط اللى اترتب عليه إنى خدت قرار تانى غلط من سنتين بس ليه بدفع تمنهم لحد دلوقتي امتى الواحد يخلص
مش عارف عندى مشكلة دائما مبعرفش أتصور خالص أنا عادى راضى عن شكلى بس مش عارف ليه دائما مبتصورش ومش قصدى الصور اللى بنزلها لا حتى الصور اللى بحتفظ بيها تقريبا عدد الصور اللى محتفظ بيها أقل من عدد سنين عمرى وبندم اوى لما ألاقى حد كان مصورنى من فترة بالصدفة وأشوف الصورة اتفاجئ
فكرة إنى مبقتش مستنى من حد حاجة دى على قد ما هى متعبة وانت بتعمل كل حاجة لوحدك على قد ما هى مريحة ومبتجيبش صداع المعضلة الوحيدة إن اللى خذلوك قبل كدا لما احتجتهم مستنيين مساعدتك دلوقتي
كل ما بقلب فى التايم لاين بلاقى قدامى الفيديو بتاع يحيى عزام بتأثر كل ما أسمعه بيقول
انت مستعر مننا يا محمد
حياة القطط أغلى مننا يا محمد
العيال اللى كانوا واخدينك قدوة أتولدوا ميتين
الموضوع ممكن يبقى عادى بالنسبة لناس كتير بس انا لا أخجل اقول إنى عيطت أكتر من مرة وانا بسمعه
موضوع الواد اللى على التيك توك اللى بيتاجر بأعاقته ده عشان يكسب فلوس من الهوا مش كوميدى خالص زى ما الناس بتتداول الموضوع الموضوع محزن ومقرف إلى أبعد حد وحقيقى الرغبة فى الثراء السريع بدون تقديم قيمة حقيقية بالبلدى كدا فلوس من الهوا بقت ثقافة منتشرة للأسف ومش مدايقنى الموضوع
1
الواحد وصل لمرحلة مكنتش أتمناها ابدٱ وعمرى ما كنت أتخيل إنى أوصلها فنصيحة منى للكل متقولش على أى حاجة لا مستحيل أبقى كدا ابدا وأدعى ربنا انك متوصلش لكدا
زمان وأنا صغير كنت بسأل نفسى هو أنا لما أكبر هبقى ايه بس كنت محدد كام حاجة عارف إنى مش هخرج عنهم
والحمد لله بقى عندى 23 سنة ولسا بسأل نفس السؤال بس بقيت محتار أكتر
هتنسى أول ما يجيب جول ويجري يحتفل وتحتفل معاه و هتنسى إنه خذلك ومفرقلوش اخواتك ولا اخواته ده لو معتبرنا أو معتبرهم اصلا اخواته واديك نسيت اهو ورجعت تقول عليه فخر العرب تانى
لو حصل وموتت اتمنى من اى حد هنا يدعيلى وإن كان معظمكم ميعرفنيش أتمنى يظن فيا ظن خير إن كنت حد كويس وإنى أستحق الرحمة ولو حد كان حصل بيننا اى كلام اتمنى يزعل ولو لثوانى عليا عشان واضح إن محدش من اللى حواليا عنده رغبة فى وجودى اتمنى تكونوا أرحم بيا منهم واتمنى اروح لربنا اللى ارحم
ركبت عربية انهارده من رمسيس لأكتوبر أكتشفت بعد ما ركبت أن الركاب 13 سودانى وانا المصرى الوحيد كنت عايز لسانى يفلت اول ما نوصل أكتوبر وأقولهم الحمد لله وصلنا الخرطوم
ونسيت اقول كمان أن كلهم كانوا ستات وانا الراجل الوحيد أنا والأسواق واللى افتكرنى بسبب ملامحى واحد منهم 😂😂
طب وأخرتها طيب !
ما اللى بنستهلكه ده صحتنا وعمرنا وحاجات الواحد مش عارف إذا كان هيعرف يعوضها بعد كدا ولا لا
والأهم من كدا واللى يخوف أكتر هو اللى بنسعاله ده يستاهل فعلا؟
أنا عارف إن الشغل فى العيد والأجازات عمتا ضرورة فى حاجات كتير ولابد منه بس بردو مش قادر اتصالح نفسيا مع الموضوع ده وانا شايف ناس شقيانه أوى فى وقت ما انا بحاول أبسط نفسى يا ترى هيكون مبسوط زيى ولا متعكنن
بدل ما انت عمال تتكلم على عمرو دياب والهبل ده فى إبادة بتحصل دلوقتي في دير البلح اقلها ادعى للناس دى وسيبك من التفاهات ولو لسا مش مقاطع ارجوك راجع حساباتك تانى