" أتذرّى في ذرى اللي من وصل له مايضام
واحدٍ من دون كِل النَاس . . قلبه حبّني
و أنتثر في وسط صدرٍ كل ما جيته حِطام
يَجمع شْتاتي دفاه وفي ضلوعه -موطني-
يوم عاَثت بي حروبي كان كلّه لي سَلام
ما تردّى بي . . ولا في يوم جيته ردّني ".
"نامي بحضني على حب ووعي
ودي اسولف على انفاستس واعيد
وان صحيتي من منامتس ارجعي
داخل عروقي وعيشي من جديد
من يقول الرزق يحتاج لسعي
هذي انتي جابتس الله من بعيد
لا يغرتس ( بالمكابر ) أدعي
والله ان بداخلي هل من مزيد!
وين ما وجهت أحس انتس معي
خالقتس ربي مثل حبل الوريد ".
" على أيسر ضلوعي بيته وداره ومركاه
أباهي وأماري فيه الأحباب وأفخر به
اناظر .. خياله في عيوني يجر خطاه
أخذني معه في خطوتينه على دربه
أدك الآراضي لازعل والسما .. لرضاه
وأدك الخطاوي لين تسمع بها ضربه ".
" قد خصّني ربّي بـ رجال .. رجال
نعمة و دعوة صادقه مستجابه
ضلعي و فرحة عمري و ظِل و ظلال
و بلادي الأكثر عطاء و رحابه
يسندني والله كنّ تسندني جبال
وأهلٍ يتفدوني .. وربعٍ ولابه
عيونه الثنتين لـ الضيف منزال
وصدره مدينه تتسع للغلابه ".
" أنا بنت قلبك ومستقبلي في يديك،
إن قلت لك خبني في داخلك ، خبني،
شكراً على اشيائي الحلوه وشكراً عليك،
وفداك من يفرح لـ مدحي و من سبني،
و تعال عندي ، أنا عندي مشاعر تبيك،
عشان اعلمّك كيف تحبني . . حبني ".