د اسلامي امارت ویاند مولوي ذبیح الله مجاهد ويلي دي چې داعش په افغانستان کې هېڅ ځواک نلري او په شدت سره ځپل شوی دی. دا څرګندونې داسې مهال کېږي چې، د ملګرو ملتونو د امنیت شورا نن (دوشنبه، د فبرورۍ ۱۰) د داعش د ګواښونو د ارزونې لپاره غونډه لري.

د پکتـيا امنيه قومنداني مسوولان وايي، د نشه‌يي توکو پر ضد منسوبينو «شنبه، سلواغې ۲۰مه» د ډنډې‌پټان ولسـوالي اړوند په ستیا سیمه کې څه باندې درې زره ټابلين ګولۍ نیولي دي. پکتيا امنيه قومنداني ويلي دي چې دغه نشه‌يي ګولۍ له پاکستانه، هېواد ته راوړل شوې وې چې زرنج موټرسایکل کې د لېږد پرمهال نیول شوي.

د احصايې او مالوماتو ملي ادارې سږ کال په هېواد کې د ۱۵۹ زره مټریک ټنه پنبې د تولید کېدو خبر ورکړی دی. سرچینې د یوې خبرپاڼې په خپرولو سره ویلي چې د احصایې او مالوماتو ملي ادارې روان کال په هېواد کې په لومړي ځل په ۱۵ ولایتونو کې د پنبې سروې ترسره کړې ده، چې پر اساس یې په ټول هېواد کې ۱۵۹ زره مټریک ټنه پنبه تولید شوې ده.

میدان‌وردګ کې په ۶۰۰زره ډالرو ۳۳ روغتیایي مرکزونو ته لمریزه برښنا برابره شوه د میدان‌وردګ د عامې روغتیا ریاست مسوولان وایي چې د ملګروملتونو د پراختیايي پروګرام (UNDP) له لوري د دغه ولایت په مرکز میدان‌ښار او ولسوالیو کې ۳۳ روغتیایي مرکزونو ته لمریزه برښنا ونښلول شوه.

د ریاست الوزرا د اداري مرستیال مولوي عبدالسلام حنفي په مشرۍ د کډوالو ستونزو ته د رسېدنې عالي کمېسیون غونډه کې د ټاکل شويو کمېټو کړنې ارزول شوې او د کډوالو لپاره د ځمکې وېش، د بې‌ځایه شویو د انتقال او د مرستو د وېش موضوعات څېړل شوي او په اړه یې لازم تصمیمونه نیول شوي دي.

د تورخم قرنطین وترنر ډاکترانو له لوري پاکستان څخه ۲۵۰۰  لوړ عمرلرونکي چرګان د کرنې ریاست مامورینو له لورې تر نیول‌کېدو وروسته بېرته دغه هېواد ته ورستانه کړي دي. یاد چرګان په تورخم کې د دوی کارکوونکو له لورې نیول شوي او بېرته پاکستان ته لېږدول شوي دي. یاده دې وي چې تر  دې وړاندې هم د ننګرهار کرنې ریاست د تورخم قرنطین کارکوونکو په ټنونو خراب ممپلي، جوار او سویابین بېرته پاکستان ته مسترد کړي دي.

د اطلاعاتو او فرهنګ وزارت مرستیال مولوي قدرت‌الله جمال لوګر ته د یوه سفر پرمهال له چارواکو سره د لیدنې پرمهال ویلي، د یاد ولایت لرغونې سیمې او اثارو ساتنه او بیارغونه د دوی لومړیتوب دی. جمال زیاته کړې چې ولایت مقام دې له اطلاعاتو او فرهنګ ریاست سربېره له یوشمېر کلیدي ادارو سره همغږي پراخه او ځوانانو ته دې د زده‌کړو، همغږۍ او فرهنګ برخه کې پروګرامونه جوړ شي.

د ټېکنالوژۍ متشبث او د نړۍ مشهور میلیاردر اېلن ماسک د "امریکا غږ" او "ازادۍ راډیو" د بندېدو غوښتنه کړې ده. د نوموړي پر اېکسپاڼه کښل شوي چې دغه ادارې بې ګټې دي او د امریکا د مالیه ورکوونکو پیسې ضایع کوي.

کندهار پنجوايي ولسوالۍ کې د يوه کانال د جوړولو چارې پيل شوې د کندهار د کرنې، اوبو لګولو او مالدارۍ ریاست وايي، چې د پنجوایي ولسوالۍ په بدوان سیمه کې د دغه ریاست له بودجې د ۳.۸ میلیونه افغانیو په لګښت د اوبو یوه کانال جوړولو چارې پیل شوې. دغه کانال به ۲۶۵ متره اوږدوالی، ۱.۵ متره پراخوالی او ۳ متره لوړوالی ولري، چې چارې به یې په دوو میاشتو کې بشپړې شي.

د ټولګټو وزارت ویاند محمد اشرف حق‌شناس وایي، چې د سالنګونو لویه لاره پرون ماښام د واورې اورښت، د لید ساحې د محدودیت، د ځاني زیانونو د مخنیوي او توپان له امله موقتاً د ترافیکو پرمخ تړل شوې ده. ښاغلي حق شناس زیاته کړې، چې د سالنګونو د ساتنې او څارنې ریاست ټیمونه د واورې د پاکولو هڅه کوي ترڅو لاره د ترافیکو پرمخ پرانیزي.

د ارشاد، حج او اوقافو سرپرست وزیر نور محمد ثاقب له «اریانا افغان» او «کام ایر» هوایي شرکتونو سره د راتلونکي کال د حج مراسمو لپاره د حاجیانو د لېږد رالېږد تړون لاسلیک کړ. د ارشاد، حج او اوقافو وزارت وایي، چې د دې تړون له مخې یاد شرکتونه د یوه منظم مهالوېش له مخې سعودي عربستان او بېرته هېواد ته د ۳۰ زره افغان حاجیانو لېږد او را لېږد ترسره کوي.

د لوګر ولایت د سوداګرۍ او پانګونې خونې مسوولین وایي چې د روان ۱۴۰۳ کال په لړ کې له دې ولایت څخه څه باندې ۱.۱ میلیونه ټنه بېلابېل کرنیز محصولات صادر شوي دي. د یادې خونې رییس محمد یعقوب مومند ویلي، صادر شوي محصولات، چې په کې مڼې، انګور، زردالو، بادام، هنډواڼې، کچالو، پیاز، رومي بانجان او نورې مېوې او سابه شامل دي، د کابل په ګډون ګاونډیو ولایتونو او بهرنیو هېوادونو ته صادر شوي. مومند زیاته کړه چې د صادر شویو محصولاتو ارزښت څه باندې ۶۸ میلیونه افغانۍ دی او دغه محصولات د لوګر له مرکز او ټولو ولسوالیو څخه راټول شوي دي.

د امر بالمعروف، نهې عن المنکر او شکایتونو اورېدلو وزارت د یوې خبرپاڼې په خپرولو سره کښلي چې تخار او فاریاب ولایتونو کې یې هغه څلور نعت ویونکي نیولي چې د موسیقۍ په سبک به یې نعتونه ویل. خبرپاڼه کې راغلي چې نیول شويو کسانو ته له دې وړاندې هم د ورته عمل د پرېښودو لارښوونه شوې وه.

د میدان وردګ-لوګر نښلونکي سړک د جوړولو تړون لاسلیک شو د ۷۱۳ میلیونه افغانیو په ارزښت د میدان وردګ-لوګر نښلونکي سړک د جوړولو تړونونه له دوو شرکتونو سره لاسلیک شول. یاد ۵۰ کيلو متره سړک د میدان وردګ له تنګي او د لوګر له بابوس سیمې تېرېږي او مرکز پل علم سره به ونښلول شي. د جوړولو چارې به یې په شاوخوا ۱۶ میاشتو کې بشپړې شي.

کابل کې امنیتي ځواکونو د موټرو د غلا يوه ډله نیولې ده. د کابل د امنيې قومندانۍ اوومې حوزې پولیسو هغه ډله نیولې چې کابل ښار کې يې موټر غلا کول. همدا شان امنیتي مسؤلین وايي، د يادې امنیتي حوزې پولیسو د مبایلونو د غلو یوه بله ډله هم نیولې، چې په کابل ښار کې به يې مبايلونه غلا کول.👇

امریکا دې د افغانانو  ۷ چورلکې راوسپاري له ازبکستان څخه امریکا ته د پخواني افغان پوځ د ۷ چورلکو د سپارلو په غبرګون کې ملي دفاع وزارت له امریکا وغوښتل، چې نه یوازې دې افغانستان ته د ټولو چورلکو په بېرته راستنولو کې رامنځته شوي خنډونه لرې کړي، بلکې هغه دې افغانانو ته راوسپاري.

د اوبو او انرژۍ سرپرست وزیر عبداللطیف منصور د غزني له سرپرست والي عبدالصمد جاوید سره په کتنه کې ویلي، چې راتلونکي کال کې به د دغه ولایت په زنه‌خان او واغظ ولسوالیو کې د ۱۰ میلیونه افغانیو په ارزښت د چکډېمونو جوړولو چارې پیل شي. منصور زیاته کړې، چې د دې ولایت په اجرستان ولسوالۍ کې د یوه استنادي دیوال جوړول هم د اوبو او انرژۍ وزارت د راتلونکي کال پروګرامونو کې شامل دي. ورته مهال د غزني والي ویلي، چې د دې ولایت په قره‌باغ ولسوالۍ کې به د زردالو بند چارې هم ډیر ژر پیل شي.

د کرنې، اوبو لګولو او مالدارۍ وزارت وایي، چې دوو ازبکستاني سوداګرو د دې وزارت له وزیر مولوي عطاء‌الله عمري سره په کتنه کې افغانستان کې د عصري اوبو لګولو او کېمیاوي سرې په برخو کې پانګونې ته لېوالتیا ښودلې. ورته‌مهال د کرنې وزیر د هغوی د دې اقدام هرکلی کړی او د هر ډول همکارۍ ډاډ یې ورکړی دی.

اسلامي امارت: غزه د فلسطین خاوره ده او څوک د بر خليک ټاکلو په اړه خپل سري پريکړې نه شي کولاى! اسلامي امارت د امریکايي ولسمشر ډونالډ ټرامپ له لوري د فلسطینیانو د بې ځایه کولو او په نورو هېوادونو کې د هغوی د ميشت کولو په اړه په یوه خپره کړې اعلامیه کې ویلي، چې دا د نړیوالو قوانینو ښکاره نقض دی، او نړۍ بايد د دا ډول توطیو پر وړاندې ودرېږي!👇