وَلَقَدْ مَنَنَّا عَلَيْكَ مَرَّةً أُخْرَىٰ (37)
الحمد لله حتي يبلغ الحمد منتهاه♥️♥️
سنة ساتة خلصت ب امتياز جراحة وامتياز نسا وتوليد وامتياز عام 🥺♥️
رسميًا حاصلة علي بكالوريوس الطب والجراحة بتقدير عام امتياز مع مرتبة الشرف 🎓♥️♥️
رسميا طبيبة امتياز بمستشفيات جامعة المنوفية🩺🤍
لما تكون عمرك لا حبيت ولا ارتبطت قبل كده
بيكون جواك كم مشاعر نفسك تشاركها مع الشخص اللي هيكون من نصيبك ..ف مهما حصل تلاقيك قافل ع المشاعر دي مستني الشخص والوقت المناسبين عشان تقدر تخرجّها
عشان ما تهدرش مشاعرك مع الشخص الغلط ..وف نفس الوقت عشان ما تتأذيش او تندم قدام
ف البيت عندنا اما حد بيتقدم عارفين اني مش هعرف اخد قرار..لاني ما اتعاملتش مع الناس ..اخري زميلاتي ف الكلية، ف ممكن انخدع ف اي شخص قدامي..ف لما حد ييجي بلف عليهم ف البيت واحد واحد ولو حد اعترض واكيد بيكون لسبب ما، يبقا خلاص مش هو دا وبيتم الرفض،وبيطلعوا هما دايما صح ف وجهات نظرهم،
هو موقف قديم شويتين كنت ف تانية كلية وكنت طالعة من امتحان وكنت طبعا مطبقة بقالي يومين ..فصحابي قرروا يروحوا يسلموا ع مدرس الأحياء بتاع الثانوية ..ف انا روحت معاهم ودخلت اسلم ع الاستاذ بنفس الطريقة دي قدام الطلبة..واستوعبت اللي انا بعمله وفضلت اعيط واعتذر للأستاذ اسبوع بعدها😂
انهاردة كان يوم مميز وجمييل جدا بفرحة دفعتنا اننا خلاص خلصنا امتحانات ..وفرحة أهلنا بينا واهتمامهم بكل تفاصيله عشان يخلوا اليوم دا افضل ما يمكن❤️❤️🫂
الإنسان كان مبسوووط اووي اوي انهاردة والمفاجآت كمان غيرت مود الواحد جداا🙈❤️
قَالَ قَدْ أُوتِيتَ سُؤْلَكَ يَا مُوسَى (36) وَلَقَدْ مَنَنَّا عَلَيْكَ مَرَّةً أُخْرَى (37)
الحمد لله حتي يبلغ الحمد منتهاه ♥️
لقد انتهينا من الباطنة والاطفال بأحلي امتياز 89.52%
Up to grade (6)💃
Senior to be♥️
بس لما يمر وقت طويل وانت قافل ع مشاعرك ..بتحس انها بدأت تأذيك انت،وتحس بوحدة..وف نفس الوقت مستني حلال ربنا المناسب ..ف بتكون ف صراع مع النفس دايما ..متأكدة ان نهايتها هتكون أفضل لأنك ملتزم بشرع ربنا
الحكاية حكاية وقت مش أكتر .....
رغم ان نتيجتي مش واو وسط الدفعة
بسبب اني ايام الامتحانات مكنتش بنام بال3 أيام ورا بعض والتوتر والتعب كنت بغلط ف أسئلة سهلة ومباشرة
بس الحمد لله فرحانة وراضية عن نتيجتي وبتمني ان شاء الله السنة الجاية اصحح من أخطائي دي
حقيقي فرحانة جداا للدفعة لان كلنا تعبنا جدا السنادي🤍
كنت ف يوم جاية البيت العشاء ونمت شوية وبعدين صحيت قبل الفجر كده اظبط كام حاجة ف الكتب ف بابا صحي عشان يصلي الفجر لقاني صاحية فقالي..انا زعلان عليكي واسف ليكي والله اني دخلتك كلية زي دي سامحيني،وربنا يكون ف عونك يا رب وتعدي اللي باقيلك علي خير..وقتها عيطت من نبرة زعل بابا عليا 🥺
أخويا حبيبي كان مسافر ف الشغل وكان بيقولي انه مش هيعرف يحضر
بس عرفت انه حاول كذا مرة يعمل اجازة عشان ينزل يحتفل معايا ف اليوم دا ومعرفش .. بس عرف يعمل اجازة يوم الجمعة وكان كل يوم يتصل بنهي ع أمل أن يوم الاحتفال يتأجل ويعرف يحضره معايا
أجمل حد ف حياتي ربنا يخليه ليا دايما🥺❤️❤️
بالنسبة للمجال الطبي الانان��ة والغدر والحقد فيه كبيرة جداا
ممكن صاحبك اللي بتفرح لنجاحه دايما يبعد عنك عشان جبت درجة واحدة زيادة عنه
بشوف ناس كتير م اللي مجاميعهم ف سنين الكلية متوسطة، تفكيرهم وشطارتهم اعلي بمراحل من اوائل الدفعة
اكتشفت انه للاسف الدرجات أهم من نفسيتك وتعبك
كان في قانون بيقول ان مكافئة الامتياز تساوي ٨٠٪ من راتب الطبيب المقيم فاحنا كل الي طالبينه بالمختصر ان زمايلنا كلهم يشاركوا في هاشتاج زيادة راتب طبيب الامتياز حسب النسبة المقررة ٨٠٪ من راتب الطبيب المقيم
#زيادة_راتب_طبيب_بشري_الامتياز
الاجيال الجديدة ف المجال الطبي بينتقدوا دكاترة كبار زي دكتور علام او دكتور موافي او دكتور نادين وغيرهم..لو هو مش مناسب لنظامك شوف حد تاني انسب..إنما ليه تنتقد شخص بذل مجهود ووقت ونزلك داتا شرح مجاني ومراجعة وعملي وبدون مقابل ..اي حد ف اي نظام بيختار الانسب ليه بدون ما ينتقد حد
شارك في تريند الذكريات🔥
صورتك اول سنه كليه vs صورتك اخر سنه
و شوف قد ايه اتغيرت
When the night actually changes✨
دا اللينك تقدر تحطو عليه صورتكم و تعملو ليها copy عشان تكون برايفت 🔥
#37_
بتفرح
#nostalgic_challenge
#let_us_fire_the_final_game
بابا بيقولي مهما كان المكان اللي هتفتحي فيه عيادة لازم تخلي يوم فري ف عيادتك +متاخديش كشف م اللي تحسيه غير مقتدر.. وتخلي يوم فري برضه ف البيت هنا هخصصلك مكان ف البيت كعيادة ليكي 🚶♀️
اللي حصل انهاردة ف لجنتنا غير الامتحان اللي كان ما يتحلش دا
لا يتحمله بشر ..ومعاملة عبيد فعلا
ربنا يخرجنا منها ع خير لأن الإنسان مبقاش يتحمل خالص ..وفعلا شكلنا هنطلع نتعالج نفسيا عشان اللي شوفناه خلال ال 6 سنين وخصوصا انهاردة
كل مرة ف البيت يتعبوا اقولهم ع العلاج اللي المفروض ياخدوه..يروحوا يكشفوا برا والدكتور يكتبلهم نفس العلاج اللي قولتلهم عليه 😂
ملحوظة: انا اللي بقولهم يروحوا يكشفوا برضه عشان مضرش حد ..بس بفرح اني كنت صح دايما🚶♀️
الدنيا بتروح لاتنين ..
واحد بيسعى أوي ليل نهار وبيحاول ويعافر، و واحد نيته حلوة وقلبه راضي وبيساعد باللي في إيده.
الأول عدل ربنا والتاني رحمة ربنا..
ربنا يكتب لنا نصيب ورزق الاتنين
ويكتب لنا نجاةً من الدنيا وعوضًا بِالآخرة
دخلت امبارح ع حالة thyroid وانا بوصف ال swelling قولت انه left side وهو كان right..ف الدكتور قالي شاوريلي عليه كده..فلما شاورت قالي دا left؟ قولتله لا right قالي نقطة زي دي تشيّلك اللجنة
قولتله معلش اصل انا left-handed وبتلغبط ف الاتجاهات
لحد دلوقتي مش مستوعبة الرد اللي قولته😂
كنت مطبقة ليلة امتحان الجينا..ف تعبت اوي قبل الفجر كده..وحرفيا مكنتش بشوف الكلام ف المذكرة ومصدعة اوي وف نفس الوقت مش عارفة انام وكان فيه حاجات عايزة ابص عليها،ف مكانش قدامي حاجة غير اني اعيط،وانا بعيط لقيت صحبتي بعتالي انها واقف قدامها حاجات لسه مبصتش فيها وقالتلي لو تشرحهالي..
من الحاجات اللي بتلفت نظري وانا ف اي مكان ف المستشفي هي أسامي العيانين الكبيرة ف السن
يعني مثلا واحدة اسمها
بدر الصباح ..سمسومة ..لطافة.. ست الحسن وغيرهم
أسمائهم حلوة اوي❤️
وهكذا بقا ع اي حاجة ف حياتي ..بخاف اخد قرارات اندم عليها ف لازم استشير غالبية اللي حواليا ..ولما بمشي بدماغي محدش بيندم غيرى ..ف نفسي اوصل للمرحلة اللي اتعلم فيها من أخطائي واعتمد ع نفسي ..نفسي ابطل ابص للناس م الجانب الطيب ونفسي ما اتخذلش تاني م اللي حواليا
رغم اني ما نمتش بقالي يوم ونص بس مش عايزة انام وعايزة افضل سهرانة وفرحانة كده .. انهاردة يوم لا يعوض بجد ..والواحد محتاج يستغل كل ثانية فيه ف الفرح وبس🤍🤍
بعد ٣ شهور من الوعود تصر جامعة المنوفية على تأخير المستحقات الخاصة بدفعة امتياز ٦+١ و التعامل بشكل لا يليق بأطباء في مقتبل العمر، بالرغم من التزام الدفعة بشكل كامل بكل ما تنص عليه إدارة المستشفي
#مرتبات_امتياز٣٧_طب_المنوفيه_فين
#امتياز_٣٧_جامعة_المنوفية
#مستشفيات_جامعة_المنوفية
والله لو كان بإمكان المرء أن يقول لأمة محمد بأكملها: "دثِروني وقلبي في دعائكم ،وعانقوني به، لفعلها"
فضلا لا تغفلوا عني فيما بقي من هذة الأيام المباركة ، سَلُو الله أن يُيسر أمري، ويَكشف همي، ويقر عيني بتحقيق مُراد قلبي ، علّ منكم مَن لو أقسم علي الله لأبرَّه!
دفعة 39 بتتخانق مع بعضها عشان جزء منهم مش عاجبه الاغنية والمنظمين مخدوش رأيهم فيها ،والجزء التاني شايف ان الاغنية جامدة ..
يجماعة افرحوا بالسيمي ومتركزوش ف التفاصيل ..فيه غيركم ما احتفلش بحاجة خالص😂💖
فيديو دكتورة لمياء ع الجروب فرحني بطريقة لا توصف ..وبجد د.لمياء اعظم حد بيشرح أطفال وأعظم دكتورة ف طب المنوفية عموما ..وبجد الانسان مبسوط انه حضر الكورس واتعلم من شخص جميل جدا زي د.لمياء ..ربنا يبارك ليها يا رب 🥺♥️♥️
It's my birthday🚶♀️
اللهم إني استودعتك عاما مضى من عمري، أحمدك أن رزقتني فيه خير الرزق، وسترتني بجميل الستر، ومننت علي بالصحة والعافية والطاعة فيه، وأستودعك عام آت، أسألك فيه الخير والعافية والقرب منك،واكفني فيه كل شر، بارك لي في عامي الجديد، واكتب لي فيه أجمل الأقدار💙💙
اخويا بيرفض حتي الخطوبة أيام الدراسة
عشان اني يا اما هنشغل عن الدراسة
يا اما هنشغل ف الدراسة فمش هقدر اقيم الشخص كويس
كنت الاول شايفة الموضوع كبير،بس مع الوقت بدأت افهم وجهة نظره وبقيت أايده ف قراره وواخدة نفس القرار بتاعه
+محدش هيستحملstressالامتحانات غير أهلي الصراحة😅
نظرتي اتغيرت لحاجات كتير جدا بعد الكونڤيشن دي،لعلها للأفضل.
صدق رسولناﷺعندما قال "نعمتان مغبون فيهما العبد ؛الصحة والفراغ"
المرحله ال انت فيها دلوقتي وبتشتكي منها ومن الضغوط ومش راضي عنها وأوقات الفراغ اللي بتستهلكها بدون إفاده دول حلم لناس كتير وانت نفسك هتتمنى لو يوم يرجع منها
كان فيه مؤتمر طبي امبارح كنت مشتركة فيه من مدة وقايلالهم ف البيت.. جيت يوم التلات بالليل قولتلهم مش هروح عشان كنت متضايقة.. بابا دخل لقاني بعيط وبقول مش هروح ..حلف عليا انه مش هيكلمني تاني لو مروحتش..وخرج اشترالي حاجات كتير اخدها معايا اتسلي بيها ف الطريق
ماما كانت تعبانة وكنت واخداها المستشفي بناء ع طلب من الدكتور .. قمة الذوق ف تعامل الدكاترة مع والدتي ..وماما حتي اما روحت قعدت تشكر ف الدكاترة قدام اللي ف البيت..وبجد نواب الجراحة مفيش زيهم ف التعامل واحترام المرضي
سنين الطب كانت طويلة اوي والرحلة كانت صعبة،والانسان كان بيقع ويكتئب كتير لدرجة ان الواحد عمره ما كان يتخيل انه يوصل لليوم دا،بس كلها عدت ب لطف ربنا ومساندة الاهل اللي عمرهم ما قصروا معانا،الحمد لله الفرحة اللي ف عيون أهلنا ف الوقت دا هونت علينا كتير من تعب الرحلة دي ..
اسمع دكتور علام الاقيه بيحفل ع الزمالك ..اروح اسمع دكتور موافي الاقيه بيحفل ع الزمالك برضه
بس thanks God كنت عايزة اتأكد ان فديوهات دكتور علام جديدة او لا ..اتأكدت اما جاب سيرة قفشة😂
بعد 36 ساعة من النباطشيات..رايحة الفجر اطلّع بيشنت العمليات للدكتور
الدكتور: يلا يا دكتورة ريهام اتعقمي عشان هتدخلي العملية اللي هتبدأ دي مع الدكتور
طبعا لو حلفتلكم اني روتيشن طوارئ وخلصت جراحة وما نمتش مش هتصدقوني..بس ف الاخر حضرتها وكانت عملية فيها suspense🚶♀️