د ميډیا تر وروستي وضعیته پخوا به ځینو خلکو باور درلود چې دنیا د کوم غوایي په ښکر ولاړه ده، کله یې چې یو ښکر ستړی شي او بل ته يې اړوي نو زلزله راځي. اوس هم ځیني کم عقلان فکر کوي، چې د دنيا اختیار د امریکا په نوم له هغه غوایي سره دی چې د ( دموکرات او جمهوریت پال) په نوم دوه ښکرونه لري. سږ کال دوی فکر کوي چې د امریکايي غوايي دموکرات ښکر ستړی شوی او دنیا جمهوریت پال ته اوښتې. په دې وخت کې د زلزلې او ډېرو تغیراتو امکان شته. په همدې خوشباورۍ کې ځینو سم مقصودي کمپاین شروع کړی، چې زموږ د مقدس صف اراده چلینج کړي. په صف کې درز واچوي او په فیسبوکي هیاهو سره د بمونو له درزا راوتلی مخلوق وارخطا کړي. دوی ته وایو، چې هغه غویی چې تاسو ورپورې هیلې او امیدونه تړلي اوس له پخواني دم نه لویدلی. هغه چې پخوا به یې نړۍ قولبه کوله اوس يې ټوله توجه دې ته چې څرنګه په خپل لکۍ له ځانه مچان وشړي. نو بناء لږ مو اشتهاء کنټرول کړئ هسې نه په محاسبوي اشتباه کې ولویږئ. دا یادونه هغو ټولو ته متوجه ده چې تازه یې له کمپونو د مجاهد په نوم نقابونه اغوستي او د دوست په پوښ کې دښمنانه تبلیغ کوي او یا هغوی چې پخوا یې د کوم تصادف له مخې د مجاهد نقاب اغوستی خو اوس د حوادثو باد ترې غورځولي او حقیقې څيرې بربنډې شوي دي.