يالفاتنه اللي ما يضاهيها مساء ولا صباح
الصبح يتنفّس هواها و المسا يزهى بها
ㅤ
تسيّد حضورك شعور القلب يا سيد الملاح
ولا فيه نبضة قلب رمشك ما يثير إعجابها
ㅤ
يا ملح نجد وزين نجد من الرياض اليا رماح
شعرك لياليها .. و طغيانك غرور إعرابها .
العيون اللي قبل شوفك من الدنيا ملوله
صار يملاها الشغف حتى وأنا أشوفك قبالي
الحظيظ اللي لقى بعيونك النجلا قبوله
من يلومه لا زهد في الأمنيات وفي الليالي .
يوم شفت المخاطر و الغرابيل حوله
مالي الا اتجمل فيه واطلق سراحه
جعل تفداه قصة حب ليلى وخوله
طاري الحب مع طاري النوادر بجاحه
اله مني سحابة مسك ماهيب توله
يسعد الله مساه ويسعد الله صباحه
ياهواة الصقور .. الجارحه دورو له
واعطي اكبر بشاره واعطي اكبر طراحه .
صوبتني برمشً صار سبة وفاتي
وصرت في عالم الاموات والموت سنّه
وجيت جداني اللي جارهم ما يحاتي
متعبين المهار ، متعبين الاعنّه
قالو اللي بصدرك ضرب سيف الزناتي ؟
قلت لا والله إلا رمشٍ احد منّه .
من نهل من فاهك الشهد ورشف بارد رضابه
" نال من دنياه شيٍ .. في خياله ما ينوله "
ملحك يجيد الدلال .. وغيّك يجيد الخطابه
لول ثغرك يشغل الملهوف عن جيدك ولوله .
عليها جمالٍ مابعد مرّ بـ الاجيال
جمالٍ على بيض الغنادير مطغيها
فرس حاكمٍ لـ ميلت بشقرً ميال
قبل ماتميل كل .. قلبً يباريها
ترفع من الجهال وتضييع العقال
يروحون في سياتها من حسانيها
تقدم لها الارواح وتقدم الاموال
تهز الدول من شامها لـ يمانيها .
منتي من الارض يمكن من بقايا قمر
نصفك مكابر قسى ونصفك ليانة حنين
منتي من اللي يمر الناس وعادي يمر
من بين خطوه وخطوه بينهم وردتين
وصرتي كبيره عمر ياحظ هذا العمر
كل ما كبرتي سنه غارت عليك السنين .
قبلة الله على وجهٍ يسد وينوب
عن أمهار الجزيره و أزين أفراسها
تلبس الجاذبيه والغنج لبس ثوب
وصيت أهلها عباةٍ تستر لباسها
كل عرقٍ جذبها نخبوي ومحسوب
فخمةٍ بالجمال و فخمه بساسها
غيدٍ أخاف من شدة ترفها تذوب
لا طواها الحنين وطال هوجاسها .
بشويش يا هبّة النسمه على راسها
هذي تفاصيلها عذرٍ مااحد يشرحه
وعيونها اللي رماح الموت حرّاسها
تقدر تسولف مع الواحد وهي تذبحه
انا فدا لإنتباهتها ولنعاسها
وللغرّه اللي تمرّ الليل وتصبّحه
حتى قصيدي تشوف انه من احساسها
تكره من يعذربه وتحب من يمدحه .
خمر ! ولاّ شهد ! ولاّ ماء سحابة !
ريقك يرّد المقفّي عن دروبه
أبرد مْن المزن في وقت انسكابه
وأكثر مْن الجدول الجاري عذوبه
يفقد الضامي على عدّك صوابه
أنتِ بس اللي تفّز الروح صوبه
كيف أتوبك وأنت لأسئلتي إجابة ؟
كل تايب ودّه أنّك من ذنوبه .