صديقة في التلاتينات قالت لبنتى تعليقا ع ارتدائها الحجاب:
انتِ مش خايفة لحسن تزهقى وتقلعيه لما تكبري؟كل اللي لبسوه في سن صغيرة لما كبروا قلعوه
عائش : الحقيقة أنا خايفة من حاجة أكبر
الصديقة : ايه هي؟
عائش : لحسن اوصل لسن حضرتك وميكونش عندى
الشجاعة البسه 😎
في #إسنا متمسكين بعادات وتقاليد اللبس والمعيشة والعلاقات لحد دلوقتي 🙂..دا الزي الرسمى للسيدات اسمه(توب و حَبَرة) لازم يكون موجود ف دولاب كل بنت من البلد أو متزوجة من البلد، مفيش حد بيخرج الا بيه،صناعة يدوية من قطعتين و من أغلى أنواع الحرير وبيورثوه للبنات زي الدهب #صعيدية ❤️
دريد لحام و محمد صبحى ، كانوا أكتر اتنين ساخرين متألقين ضد الظلم والقهر في الوطن العربي ! ومع اول اختبار حقيقي واقعي سقطوا وأيدوا الظالمين أنفسهم
دا اكبر دليل انهم كانوا بيساعدوا الظالمين في تغييب عقول الشعوب والسخرية من آلامهم ولما الشعوب فاقت انحازوا لاسيادهم
هختم بالموقف ده لعبدالله بن الزبير مع الخليفة عمر بن الخطاب رضى الله عنه..علموه لأولادكم :)
مرّ عمر بن الخطّاب بالصبيان وفيهم عبد الله بن الزبير، ففرّوا ووقف؛ فقال له عمر: ما لك لم تفرّ مع أصحابك؟ فقال: يا أمير المؤمنين، لم أجرم فأخافك، ولم يكن بالطريق ضيق فأوسع لك.
صفحة مؤسسة التربية الايجابية الامريكية منزلة منشور بتدعو فيه الى(احترام علاقة الشواذ) وازاي نساعدهم يطوروا علاقتهم بشكل صحى
بصفتى معلمة تربية ايجابية معتمد و عضو في مؤسسة التربية الايجابية العربية ..أرفض جملة و تفصيلا محتوى هذا المنشور لانه ضد عقيدتى وحرام في الاسلام
و مش بسمح ولا هسمح لحد انه يتجاوز حدوده مع اختيارات اولادى الشخصية :)
من أسباب ضعف شخصية اغلب ولادنا اننا بنسمح للكبار يقولوا رأيهم فيهم ومايدافعوش عن نفسهم بحجة( عيب دول كبار) و بحجة الاحترام...كأن كل اراء الكبار هي الصح!
هو طبعا انا محكيتش تفاصيل كتير
عائشة من وقت لبسها للحجاب و اغلب اللي بيشوفها يا بيقولها اوعى تكون ماما اجبرتك عليه او مش خايفة لحسن تقلعيه ...مش حرانة ؟ مش هتزهقي و تبقى نفسك تلبسي زي البنات و و و و
ف ايوة انا علمتها ترد بالشكل ده عشان تحط حدود بالأدب و دي حرية شخصية
أول ليلة لأمى في القبر اللهم اجعل الليلة أسعد لياليها
اللهم مدّ لها في قبرها مد بصرها
وهون عليها وحشة القبر وظلمته وآنس وحشتها
وهون عليها ضمة القبر واجعله كضمة الأم الحنون
واجعل الليلة وكل ليلة أسعد لياليها
اللهم كن لها بعد الحبيب حبيبا ولدعاء من دعا لها سامعاً ومجيبا
آمين
ليه بعض المسلمين بيفرحوا اوي بالكريسماس ويتصوروا و يخرجوا،
لكن في عيد الاضحي او الفطر نفضل ننشر بوستات عن قد ايه العيد ممل وكله نوم ومش بنعمل فيه حاجه مفيدة ومش ينبسط نفسنا فيه !؟
اجعلوا من أعيادكم ايام مُبهجة لأولادكم ؛ عشان مايفرحوش بأعياد لا ينتمون لها مُضطرين! دا اختياركم
مفيش مسلسل شفته لحد دلوقتي من انتاج ( نتفليكس) الا وبيجيب نموذج للشواذ و بيكونوا اطيب و الطف ناس في المسلسل ومش بيأذوا زي الباقيين !!
ناخد بالنا من زرع الافكار دي عالمدى البعيد وربنا يستر !
أتأخرت في الخلفة 3 سنوات وتقريباً الدكاترة قالولي استحالة الحمل ،كنت بطلع صدقة وأقيم الليل و ادعي دعاء سيدنا زكريا(رب لا تذرني فرداً فأنت خير الوارثين) والحمدلله رزقني بولد وبنت بفضله 😃
أطرق ابواب الكريم ولا تملّ إن الله يحب العبد اللحوح في الدعاء .
هنية: أقول لإخواني في السلطة الفلسطينية إنكم أعطيتم المفاوضات كل شيء خلال 27 عاما، وكانت المحصلة صفر للأسف الشديد.
معركة سيف القدس أنهت مرحلة، وبدأت مرحلة جديدة، والجماهير وقفت في كل مكان خلف المقاومة.
#فلسطين_قضيتي
بابا حبيبي بيحافظ ع نضافة البيت كإن ماما موجودة وأكتر .. لما بنزوره بيفضل يشيل ويرتب ورانا من قبل ما نمشي ...
وفاة الزوجة قبل الزوج اعتقد أصعب بكتير من وفاة الزوج اولاً ..شعور الزوج بيكون أصعب ومش اي حد بيفهم ده فيه..الزوج الأرمل بينكسر و يتوجع و يتألم وقليل اللي بيقدر ده فيه.
الاكونت يترنح بقاله كم يوم ; مش فاهمة فيه ايه ... ليه كدة !؟ده انا طيبة اوى 😭
مكسوفة منكم والله بس بجد كل مرة يطلب تأكيد والمتابعين بيتبخروا 😌
#دعم من فضلكم
بمناسبة تعليق يسرا اللوزي بخصوص بنتها
أنا كمان فخورة ان والدي من الصم والبكم واتعلم و علمنى و رباني وشجعنى اني اكون ما انا عليه الآن 😃 حاسة بالناس ومقدرة يعنى ايه فقدان حاسة من الحواس واد ايه اننا في نعم كبيرة بس شايفين ما ينقصنا فقط وتاركين كل النعم ،ومن هنا اتعلمت الايجابية
من السُنة انه اذا مات حد من اهل جيرانك او اصدقائك او معارفك .. اننا نساعدهم بالطعام لانهم بييقوا مشغولين في حزنهم و غير قادرين ع الطبيخ …
نوع من التكافل و المرحمة و الود ..سُنة طيبة حسنة ياريت نفتكرها دايما
مارسوا الجنس يا جماعة و اشربوا مخدرات و امشوا ف الشارع ملط بس ما تلبسوش حجاب ولانقاب ولا تربي لحيتك عشان دي مش حرية شخصية ولا تعلم ولادك الصلاة و تربيهم ع اتباع السنة عشان دى مش حرية شخصية و لا دينية ...كله الا عقيدة المسلمين ..مارس اي عقيدة بس اسلام نو ..
عالصبح
زوجة ٣٨ سنةً زوجها منكد عليها عيشتها ومخلف منها ٤ ولاد منهم اتنين نظرهم ضعيف جدا ....مؤخرا من سنة ونص ساب البيت والمسؤولية والعيال وهجّ. والزوجة بتربي و تصرف لوحدها !! مفيش وظيفة ثابتة
انا تعبت من كتر الحالات دي وبقيت عاجزة قصادها...شعور بالعجز سخيف 🥺
لولا القرآن والأذكار والدعاء والقيام كان زمانى مُت من وقت مرض أمى
فالحمدلله ع نعمة القرآن و التسليم بأمره
اللهم إنى سلمت أمرنا إليك
رغم ذلك مجهدة و حزينة وقلبي مفطور عليها ..يارب يارب يا من لا يعجزه شئ في الأرض ولا في السماء ..اكتب لأمى النجاة أنت قادر على كل شئ ..آمين
محاولات خبيثة لتشكيل وعي مشوه للجيل الجد��د في ظل انشغال الأهل اما بمشاكلهم الخاصة او بلقمة العيش او بالخناقات في الواقع الافتراضي للدفاع عن فكرة او فئة او او او او واختفاء متعمد لدور المدرسة والمعلم والمسجد .. ده انطباعي والله اعلم
معركة الخاسر الاوحد فيها هى البيوت الآمنة
عمتي وحماتي ، اختارها الله لتكون بين يديه اليوم وهي صائمة، لا أُزكيها ع الله ، ادعولها بالرحمة وادعولنا بالثبات ، ولا نقول إلا مايُرضي ربنا، إنا لله وإنا إليه راجعون
اللهم اجعل الليلة أسعد لياليها وشفّع فيها القرآن والقيام و الصيام
ماتت نرمين زميلتي الجميلة والأم الرائعة مريضة بالسرطان ، لما قابلتها أول مرة مسمعتش منها ولا مرة كلمة فيها يأس او ضجر او حتى شكوى ! معرفتش انها مريضة بالسرطان غير بعد فترة من معرفتها ومش منها ..اللهم اجعل مرضها في ميزان حسناتها
هكذا هي الدُنيا ..ولا نقول الا ما يرضي ربنا
ضابط في شرطة الآثار بأسوان ضرب مفتشة آثار بالقلم على وشها عشان سيادته بيشرب شاي وحاطط الصينية ؏جزء أثرى في معبد فيلة وهي حاولت تمنع تكرار المشهد دا ، فاستدعاها فرفضت تروحله راح جالها بنفسه وأداها ( قلم ؏ وشها)
قصة قصيرة حزينة ...
في الراديو بيقولك ايه ، ان يوم وفاه جمال عبدالناصر كان في أسطول بحرى جاي من امريكا و لما سمعوا بوفاته رجعوا بلدهم 🥺و القائد بتاعهم طلع بيان وقال "قد مات الذي كنا اتينا من أجل محاربته فليس لنا في الحرب حاجة بعد موته " اهئ اهئ اهئ. واحنا مصدقين طبعاً 🤣🤣🤣 #ثورة_يوليو
كل من يدعي الذوق والحرية و الايتيكيت واخلاق، ييجى عند (الدفاع عن العقيدة) بالكلمة و توكيد الذات يقولك ( فين تعاليم الاسلام من الكلام ده )يعنى لما حد يتحرش ببناتكم و يتنمر عليهم هتعلموهم يسكتوا عشان دول كبار!؟ ايه التناقض ده؟
Oh no
هخاف انا بقي واتكتم بسبب احكامكم العجيبة دي
💕💕احلى خبر أنهى بيه اليوم ..صديقة سنها ٤٥ سنةً مكنتش تزوجت قبل كدة ربنا رزقها بزوج مناسب جدا لظروفها ..سبحان الله ...وبيقولها احنا ماتقابلناش من بدرى ليه 😅... اللهم اجمع بينهما في خير
كل يوم ولحظة بتمر علياوأنا خايفة على بابا وماما..عارفة إن الرضى بالقضاء والقدر من الإيمان ومؤمنة به جدا، لكن بجد بتمنى انهم مايمرضوش ولا يتألموا لإنى هتعذب بألمهم ،كل ما اتابع توابع مرض كورونا لكبار السن بدعو لأمى و أبى بالنجاه منه و من كل مكروه وسوء ولنفسي بالثبات واليقين ،يارب
من ٧سنين كنت بدأت ممارسة الرياضة بانتظام داخل gym النادي ،في الساونا قابلت عضوة روسية الجنسية متزوجة مصرى،نصحتني نصيحة غالية ، قالت ان الساونا دي يجب ان تواظبوا عليها أسبوعيا في( مصر ) احنا ف روسيا دي من اساسيات الحياه ، لإنها بتخفف من التوتر والقلق و كمان مفيدة للاسترخاء +١
سولافة سليم
واحدة بتنشر محتوى تربوى
عايشة ف المانيا
عملت فيديو صغير لدعم فلسطين
اتبعتلها تهديد
الله اعلم بتفاصيله
ف هي مسحت المحتوى الخاص بفلسطين !
لسة حد شاكك ان الSهـاينة انهزموا معنوياً !؟.
لو عندك اولاد في مراحل مختلفة و بيتخانقوا مع بعض في البيت، سيبهم يتخانقوا وماتحلّش مشاكلهم..راقبهم من بعيد، راقب طريقة حلهم للصراع و الاتفاقات..حمّلهم مسؤولية اخد حقهم بالعدل..واذا طلبوا حكمك اشرح لهم انك محتاج تسمع من كل واحد فيهم بالتفصيل عشان تقدر تحكم بينهم لانها مسؤولية صعب
والدتي رأت رؤيا لعلها خير إن شاء الله ، قبل الفجر الليلة دي ،سمعت أصوات تكبير في المساجد و جلجلة أجراس الكنائس فقالت هو حصل ايه ، رد عليها ناس ان مصر نجاها الله من الكورونا .. يارب لعلها رؤيا خير
😊
علامات العلاقات الصحية :
1/ مرتاح ومش بتشرح كل مرة سبب تصرفك وتبرر ليه بتعمل كدة
2/ على طبيعتك ومش مضطر تتصرف عكسها
3/ بتتعامل وفق قيمك ومعتقداتك بسهولة
4/ في الخلافات مفيش اهانات ولا تجريح
5/ مفيش اعتمادية طول الوقت ولا استغناء كامل
6/في العلاقة الصح نجاحك هو نجاح شريكك
كل ما بلوجر تقلع الحجاب تطلع تعلم الناس الادب وتعمل فيديو يتشاف بالملاييت وانه ده قرار شخصي! لما هو شخصي جدا طالعة تتكلمى عنه ليه!؟
تانى بلوجر تقلعه في اسبوع .. !
كنت ف بيت حماتي الصبح 😟، البيت وحش جدا من غيرها .. لكن ريحة المسك والعود اللي اتغسلت بيهم موجودين ..دخلت عالمطبخ زي ماكانت تحبني أعمل ، ونضفت التلاجة ووزعت اللي كان فيها ، ربنا يجعله في ميزان حسناتها، بيتها كان دايما مفتوح لأي حد وأي حد بيجي في معاد غدا كانت لازم تغديه#حبيبتى
تحية لكل زوج و أب في بلادنا يصحى تعبان جدا و نفسه يستريح ولو يوم من ضغط شغل مابيخلصش، لكن يفتكر فواتير كهرباء وغاز وإيجار و تعليم و تغذية وصحة و ترفيه ...لكن مُتهم ب( الإهمال) في مسؤولياته ! وهو الذي يحتاج تقديراً من نوع آخر فلا يجده .. رفقاً به
آخر كلام ل د/محمد ابو الغيط رحمة الله عليه
فعلا ..لا بأس ببعض الملحمية والبكاء والنوح ع الصحة ولكن بدون إفراط…
"وكل يوم من المُعافاه فهو انجاز عظيم" #الحمدلله
انهاردة 12 يناير ذكرى يوم من أصعب الأيام اللي عشتها في حياتى..يوم خارت فيه قواى وفقدت فيه الحب غير المشروط والدعم والحنية والونس والحكمة والطيبة والمودة .. اللهم هوّن هوّن ..
ولاحول ولاقوة الا بالله العلى العظيم ..
ادعو لأمى بالرحمة و بالسعادة في الدار الآخرة و ادعولى بالصبر
غرقانين في نعم ربنا و مش بنحس بقيمتها غير لما نفقدها..صاحبتى جوزها مات من شهر بتقولى مكنتش متخيلة انه هيسيب فراغ كبير كدة،مكنتش شايفاه بيعمل اي حاجة وعمرى ما شكرته ع حاجة جابها بالعكس كنت بقوله وحشها وغيرها..فضلت ترغي ساعة عن مكانه اللي فضى!
يارب فكرنا بنعمك التى لاتُعد ولاتُحصى
#الشيخ_المنشاوى لنا الفخر كعائلة من إسنا ، إننا أول من اكتشف هذا الصوت الرائع، الصورة دي في صالون بيت العائلة وتُعرف ب(السرايا) ، أول مرة يقرأ المصحف المجوّد كان في ديوان العائلة لإحياء ليالي رمضان يوميا و في عزاء جدي البرلماني الكبير وقتها مدنى حزين ، وتم اكتشافه إذاعيا بعدها.
"فإذا فرغت فانصب"
الحمدلله ع نعمة الصلاة والدعاء والتضرع الي الله
ليلة وفاة امى وقلبي مفطور ومفيش حاجة قادرة تهدينى قررت اختم القرآن كله في ليلة واحدة الي ان اصبحنا ع خبر وفاتها وختمته و هي بتُدفن في الثرى !!اللهم اجعله شفيعا. لها وعلواً لدرجاتها وتخفيفا وتسهيلا لحسابها آمين
وحشنى شغلي..وحشتنى جلسة الصباح بعد صلاة الفجر..وحشنى السفر ..وحشنى انى البس وانزل اتمشى في الشمس..وحشنى انى افاجئ ولادي ونخرج خروجة ممتعة ونستمتع بنعم الله علينا من شمس وهوا وجمال الحياة، وحشتنى خروجات اصحابي فالحمدلله ع نعمة المتع البسيطة فاللهم رد إلى صحتى وعافيتى اللهم آمين 🦋
شاب خريج دبلوم صنايع اخترع بدلة بنسيج معين لحماية عمال المصانع، راح يقدم اختراعه هنا ف مصر سخروا منه ، طلع عالسفارة الأمريكية ،قبلوا اختراعه بعد ما تأكدوا انه هو المخترع الحقيقي، وقدموله عرض للهجرة والإقامة بأسرته وتنفيذ الاختراع في امريكا ، طبعاً وافق عالعرض دي فرصة العمر .
"صباح الخير للذين يؤمنُون بقسمةِ اللهِ وعدله وأنّ كلَّ شيءٍ زالَ منهم زالَ عنهم، وأنّ كلَّ ما ذهب من أيديهم لم يكن بالأصل لهم، وأن عطاء الله رحمة ومنعه حكَمة، وأن من تمام الإيمان أن نؤمن بحكمة الله التي لا نراها كما نؤمن برحمته التي نراها."
#صباح_الخير 🦋
اللي حابب ينزل 10 ك لحد العيد الصغير ،هقلكم ع طريقة ..من بكرة وقف النشويات والسكر والملح في أكلك ، وافطر كويس اوي بروتين وجبنة و زتون و خضار مع تفحاية ومكسرات ،واتغدا بعد 8 ساعات بروتين واي خضار معمول بالتسبيكة عادي وطبق سلطة بالزيت والليمون ..كتر كتير اوي شرب مياه طول الفترة دي
متحكمش ع تصرفات ابنك/بنتك وهم في سن التقلب..خاصة في مواضيع العبادات ، حاول بس تنبهه باللين مرة و بالمحاكاة مرة وبالحزم مرة ..السن دا بيتكاسل عن الصلاه و دا طبيعي، واتبع قول الله ﷻ"وأمر أهلك بالصلاه واصطبر عليها" يعنى ماتزهقش من التوجيه لكن بدون اجبار اوتهديد و كن له قدوة.
أعوذ بالله ،من أن يعميني البلاء عن لطف الله بي....
أنا اتكتب لي عمر جديد ، الحمدلله الحمدلله الحمدلله....
دعواتكم ،عشان الدكاترة منعوني من الصيام ،وعندي شعور بالحزن الشديد 😔
أربعة أحاديث هي تغنيك عن حضور أربع دورات تدريبية لأربع مهارات مهمة جداً ..
لأنها تجمع أصول الأخلاق والأدب وهي ميثاق على ال مسلم أن يلتزم بها.
▪المهارة الأولى :
قال رسول ﷺ : « من كان يؤمن بالله واليوم الآخر ، فليقل خيراً أو ليصمت » .
" مهارة ضبط اللسان "
+
كليات القمة ف الجامعات المصرية بمصاريف !!!
الطب ٦٠ الف
الهندسة ٥٠ الف
الصيدلة ٤٥ الف
التجارة ٤١ الف
حاسبات ومعلومات ٣٠ الف !!!!
طب الناس تعلم ولادها ازاي ف الزمن دا ؟؟
#تعليم في زمن البؤس
إنه عام الفقد والحزن بامتياز
زوجة أبي الطيبة في ذمة الله
ولا نقول الا مايُرضى ربنا إنا لله وإنا إليه راجعون
اللهم اغفر لها و تقبلها في الصالحين واربط على قلب اخوتي
اللهم آمين
واغفر لنا واعف عنا إذا صرنا إلى ما صارت إليه
فقدان الشخص الذي منحكم الحياة يغير كل شيء بداخلك
لا أحد مستعد أبدًا للتخلي عن الشخص الذي أمسك بيده، وراعاه و احتضنه وأحبه من دون قيد أو شرط
بالرغم من شعورى بالإرهاق والألم الذي يسيطر على جسدى ويكسر قلبى لكن صابرة و محتسبة وراضية اللهم لا راد لقضائِك ولاحول ولا قوة الا بالله.
اليوم إن شاء الله - أول ليلة من رجب -
شهر من الأشهر الحُرُم ، تُغلظ فيه المعاصي كما تعظّم فيه الطاعات ..
وتهل فيه نسائم الأنس والاستعداد لرمضان ♥
اللهم بلغنا
طوبى لمن أصلح نفسه قبل رمضان
#صباح_الخيرᅠ 🌷
ابن عمى ، اصغر أبناؤه سناً ، بيصحوه من النوم ، لقوه متوفي 😞
اللهم اغفر له وارحمه و ثبته عند السؤال و جاف التراب عن جنبيه
ولا نقول إلا ما يُرضى ربنا ، إنا لله وإنا إليه راجعون .
..الأسبوع دا من أصعب الأسابيع اللي مرت عليا..عندي شعور بالحزن و الخوف،
يارب اشفِ نهى بنت خالتي ..جاتلها سكتة دماغية بدون مقدمات .. يارب انت قادر تشفيها و يا من تقول للشئ كن فيكون يارب ردها لزوجها وأولادها معافاه من كل مرض ...ادعولها لعل دعاء حد منكم يُستجاب ..آمين
حقيقي ؛ محمد صلاح مهما نجح كروياً و اخد بطولات عالم الا انه فشل انسانياً ؛ انا حزينة انك مسلم مصرى و القضايا الإنسانية الخاصة بالإسلام بتتحنبها متعمداً ، مع انك بتتكلم عن قضايا اخرى
@MoSalah
اخلع عباءة البطل العالمي وكن انساناً مرة واحدة بس في حياتك !
من عاداتنا في #الصعيد ان مش كل البيوت بتدبح اول يوم العيد ..الدبح بيكون يوميا لحد مغرب آخر يوم في التشريق ، عشان بيوت الفقراء تلاقي كل يوم لحم طازة لإن مكنش عندهم ثلاجات تحفظ اللحوم من الحر ..واستمرت العادة دي لحد اليوم
#الأضحية #عيد_الاضحى #عيد_مبارك
وعلى سبيل الفرحة شفت ماما في المنام الليلة 😍
كانت بتوصينى بشئ وأنا بقولها كعادتى معها ( حاضر)
ماما دخول شهر رمضان علينا من غير وجودك مؤلم جدا جدا .. مفتقداكِ ولا يصبرنى الا وعد الله لنا باللقاء إن شاء الله ..اللهم لقاءً عند الحوض والموعد الجنة بإذنه .. آمين آمين آمين