قولت من فترة نخزن ورق عنب أحتياطي قالولي لأااا كده وزعقوا وهو أي زحمة في الديب فريزر وخلاص، طبعًا أنا جبت برضوا وخزنت وحاليًا كيلو ورق العنب بـ66 جنيه و not all heros wear capes أنا لابسة بيچامة عليها دبدوب عادي
فيه موقع أسمه find the invisible cow. بيبقى عبارة عن صفحة بيضا وفيه صوت بقرة شغال، ولما بتبقى قربت منها صوتها بيعلى ولما بتبعد صوتها بيقل وبتفضل كدة لحد ما تلاقيها، الموضوع فيه جزء عته صغير بس جميل أوي، وأنا حققت غرضي من الحياة النهاردة وهو إني لقيت البقرة <3
كوكي بتلاقيني ماسكة كيس العلاج بتاعها بتعرف إن ده معاده فاتروح تستخبى في حتت ضيقة عليها وبيبان ديلها أو مناخيرها أو ودن من ودانها، فابعمل نفسي مش شايفة وأقول كلبتي ياناس راحت فين، يالهوي ياكوكي تعالي مش لاقياكي. فا تروح زي الحمار الطائش طالعة بتجري عليا واللي هو أنا هنا، هنا بصي.
واحد من ولاد أخواتي أهل مامته بيدلعوه يقولوله يا لولو، فا وهو ماشي من عندهم بيقولوله باي باي لولو، فاهو بقى مقتنع إن باي باي لولو دي كلمة واحدة فاكل مايجي نازل من عندنا أو يحب يسلم عليا يقولي باي باي لولو نون�� *بيدلعني يعني* باي باي لولو تيتة ويبوسنا ويمشي :'D ♥️
كلبتي عندها أربع سنين ومازالت بتتخض فشخ لما بتعطس أو أنا أعطس قدامها، ولو عطست وهي عطست بعدي بتبصلي بصة كلها ذهول اللي هو إيه اللي حصل دلؤقتي ده؟ إنتي عملتي فيا إيه؟ أنا هموت أنا وإنتي؟ إنتي خدتي بالك من الصوت ده؟ وعبيطة أوي ببقى عايزة أحطها في ربع رغيف وأكلها
بكتشف ف اماكن جديدة في اسكندرية عشان ابن اخويا هيدخل nursery school كمان كام شهر ودي حاجة كنت مستنياها من اول ماتولد عشان اخده من هناك في يوم ثابت كل اسبوع نخرج فيه سوا وتبقى دي العادة بتاعتنا لحد ما يكبر وابقى انا كمان كبرت فايجيلي بيتي بقى ونقعد ناكل تارت قدام التليفزيون🥺
إبن أخويا 3سنين بيدافع عن إبن أخويا التاني سنتين وكل مامته تزعقله يقولها ده بيبي حرام عليكي، فابقوله ياحبيبي بس إنت كمان بيبي، قالي لأ يانونو بيبي لأ، أنا صغنن وبيتكلم بمنتهى الجدية باعتبار إن صغنن أكبر من بيبي، وكنت أتمنى ولاد أخواتي ياخدوا أي حاجة مني غير العته
الأسبوع اللي فات جبت A في أول semester ليا في الكورس وطلعت الأولى على الجروب، فا ماما بتقولي طيب مش المفروض تاخدي فلوس ولا أي مكافأة وفضلنا نضحك، روحت النهاردة أدفع لتاني semester لقيت معمول ليا discount 50% عشان كنت الـ topper student، وبجد الحمد الله والشكر لله دايمًا والله :')
لو سألتني إمتى حسيت إنه الست دي أمي هقولك في يوم كنا معزومين عند حد من العيلة وبيتوزع علينا جاتوه سواريه من العلبة كده عشان إحنا عيلة عشوائية، وهي قاعدة في مكان وأنا مكان، وطلعنا إختارنا نفس نوع الجاتوه وماعجبناش اللي كان بالريدڤيلڤيت برضوا
من ألطف اللحظات على قلبي واللي بعيشها بقالي ١٢ يوم هو الدعا والأحضان اللي باخدها من بابا وماما بعد ما بعملهم السحور والفطار، حرفيًا ربع ساعة كاملة: ربنا يخليكي لينا، ربنا مايحرمناش منك، ربنا يحققلك كل اللي نفسك فيه، ربنا يهون عليكي كل اللي جواكي وأنا couldn't ask for more
كنت واخدة قرار إني هحط حدود معا الناس اللي ماعرفهاش، المهم نزلت الكلية النهاردة وبنت أتعرفت عليا وطلعت متجوزة والحمد الله بعد خمس دقايق لقيت نفسي بسألها حماتها كويسة معاها ولالأ لأن مامتها متوفية، وإني ممكن أذاكرلها اللي هيوقف معاها، وسعد زغلول قال مفيش دين أم فايدة فعلًا
مش شايفة مايستدعي من هجوم على الراجل اللي عايز بلايند ديت، الراجل كويس ومحدد هو عايز ايه وواضح وصريح. عايزين تقيموا عليه الحد عشان قال اللي إنتم بتعملوه هنا عامًة بس من غير لف ودوران وطرق ملتوية وعدم سلكان، فأنا مش فاهمة إنتم بتفكروا منين :'D ؟؟
بطمن على ماما، فا فضلت تحكيلي اللي حصل وإنه الأستاف جميل وطلبت نسكافية وجابولها و سكتت وقالتلي بس أنا زعلانة أوي، فا قلقت بقولها ليه ياماما؟ قالتلي عشان الممرضين والدكاترة مأكلوش حاجة كويسة مش لو كنت بصحتي كنت طبختلهم شوية لحمة تقويهم. حبيبة قلبي، الحنية كلها أتحطت في أمي والله
8:22pm
Friday, Jun 10,2022
وأخيرًا أنا النهاردة خلصت أخر إمتحان ليا في حياتي كلها.
لو كنت شوفت النهاردة حد حاضن روب التخرج بتاعه وبيتمشى في شوارع إسكندرية، متخافش ياصاحبي ده أنا.
حقيقي مش عارفة أوصف أنا حاسة بإيه، بس أنا طايرة من الفرحة.