الرحله اللي عليها الحجز ماهو متاح ماتستحق الوقوف بصالةالانتظار استودعك ربما بعدالوداع ارتياح نصف القناعات توصي بااتخاذ القرار مستشار الادب الشعبي بجمعية الثقافه
ماتاقف الدنيا على من تجاهلك
كم ضاع فيها من كبار الهقاوي
اللي يبي وصلك وقربك يحصلك
بعض المواقف ماتجي باالمناوي
واللي يبي بعدك مع الوقت يهملك
مالك ومال اللي على البعد ناوي
هذاك لو ترضيه يرجع ويزعلك
رضاك عنده مع زعلك متساوي
خذها نصيحه من تجاهل جمايلك
البس على فرقاه بشتٍ حساوي
اكذوبة الأسهم
موت الوله والشوق والوصل والبوح
تجي بعد يمكن ومدري وأحاول
بعض العبارات اعتبرها بلا روح
اكذوبة الأسهم بسوق التداول
ياشينها لاصرت ساكت ومجروح
وتشوف ف المبنى خطايا المقاول
اما تعديها من الطيب وتروح
والا تحاسب كل من هو تطاول
مروي السديري
تذكر هذاك القلب الابيض كيف كان
وتذكر بطيب ولطف كيف يعاملك
اليوم جف من العواطف والحنان
ماعاد مثل اول تجي ويجاملك
اصبح قوي من كثر صدمات الزمان
اقسى من الصدات في تعاملك
فقد الثقه يقضي على حلم الامان
اذا شكت كفك برووود اناملك
انا مغادر وانت دور لك مكان
تأكد ان العفو ماهو شاملك
(مرت سنه)من سرعها كنها يوووم
معها يابو مروي مطاليق راحو
تسرق لياليها من الغافل النوم
تضحك بها ناسٍ وكم ناس ناحو
دام العمر محدود والرزق مقسوم
ياليت عبّاد الحياة استراحو
لو كنت ماني بااغلب الناس ملزوم
لاكني ازعل كان في يوووم طاحو
مروي السديري
كم واحدٍ صيته قهر حارس المال
كريم واهل الأرصدة حاسدينه
بيته مثل صدره مدينه ومدهال
تقول هذا اغنى رجل بالمدينه
رجال لكن عن ثمانين رجال
حب الكرم يشبه غلا والدينه
الوقت ماهمه لو حموله أثقال
طلق المحيا ليت تبطي سنينه
ميزة غني النفس ياضايق البال
يشوف هالدنيا صغيره بعينه
امس باالصدفه ولاادري ويش اللي وداني
صوب حي الخالديه ليتني ماجيته
استجدت يوم جيته ضيقتي واحزاني
تصحي انواع المواجع كل ما مريته
كان يسكن فيه ابوي وصفوة الجيراني
يوم نصف اهل البلد ماحط سور لبيته
ذكريات الراحلين وقدرهم ماهاني
كم رجلٍ غادر الدنيا وباقي صيته
مروي السديري
"من لايحس بقيمتك واهتمامك
عامل هل الصده بنفس التعامل
ومن لايقدر ويتجاهل كلامك
حب الكرامه غير حب المجامل
اكحل عيون اللي مايعرف مقامك
ان كان تبغى راحتك لاتجامل
احرص على من يشبهك في مرامك
على العهد تلقاه وافي وصامل
هذا هو اللي يستحق احترامك
لو بك عيوب يشوفك انسان كامل
اهداء الى الجوف واهلها الاوفياء
الجوف يابسام من بادي الوقت
احبها من حب اهلها من اول
لا ابطيت عنها من غلا اصحابي اشتقت
كم مرتٍ بغيابهم قمت امول
مايوم عن واجب هل الطيب دنقت
ماهو غلا من بالكلام يتسول
وانا شمالي مااذكر اني تضايقت
لكن مكانتهم بصدري تجول
مروي السديري#
الرفقه اللي على عز ومعزه وطيب
تكبر وطوّل العمر يقصر ولاضرها
حتى ولو باالوجيه الوافيه بان شيب
تبقى على عهدها والوقت ماغرها
اوجيه عنا تغيب وذكرها مايغيب
ووجيه ربي يحفظ الناس من شرها
اسأل مجرد بهاالدنيا وخل الطبيب
حلاة الايام ذابت من كثر مررررها
مروي السديري
نركض ورا الدنيا وتركض ورانا
وايامها مثل الليالي معازيب
ياسرع ممشاها ومااقصر خطانا
عجله ولاندري عن الجاي والغيب
نضحك من الغفله وتضحك معانا
ترضي مخاويها وتزّعل هل الطيب
لو كانت الدنيا تجي في هوانا
تبطي عوارضنا خليه من الشيب
لكن بهاالدنيا بلانا بلانا
حنا معاها خوة الشاه والذيب
البيت اذا مايجيه ضيوف
وش فايدة كبر ديوانه
لاصار ماصاحبه معروف
ولا. احد وقف عند بيبانه
خل السوالف على المكشوف
المكرّررررم الله رفع شانه
الخوف هرجة ضعيف الشوف
اللي بقلبه على لسانه
كم هرجةٍ جابها ملقوف
اتفرّق الاخ واخوانه
أنا في رجا الله ماترجيت حاجه منك
مادامك تشوف ان الخطا في عيونك صح
خسرت الشعور اللي يساوي خزينة بنك
تراجع كثيررر ومن تجاهلك قل وشح
فلا عاد تسأل كان طوّل غيابي عنك
على وين ماتبغى تغادر وتمشي رح
يقولون عشرة من مزاحه وصدره ضنك
مع الوقت تظهر به علامات قلة صح
مروي السديري
افقدك قبل النوم وادور عليك
واذا صحيت من المنام اشتاق لك
الوضع بغيابك على حطة ايديك
ركز معي واسمع وخذ ماراق لك
لوغبت عنك المشكله قلبي يبيك
وان جيت ارده عنك هو ينساق لك
خصرك لويسولف تأكد يشتكيك
باالله قلي كيف خصرك ناقلك
عليه بسم الله وبسم الله عليك
وعلى سلامة في غيابك عاقلك
مال المهمات الكبار الا الكبار
الفوز فرحه والسماء غيم ومطر
نفوز بقيادة طويلين العمار
مثل مافازت في محبتنا قطر
بوح الشعر صوره وفكره واختصار
وانا هنا يدور في بالي شطر
مبطي لنا هيبه وموقف واعتبار
قوة عزيمتنا مخالطها سطر
مبروك فوز المنتخب والانتصار
خلى المرشح للبطوله في خطر
البحر صلف الهبايب ماتهزه
والعواصف لو تمرّه شي عادي
ان تجمعنا على عز ومعزه
وان تفرقنا على طيب ومبادي
والله لنحفظ مقام اللي نعزه
والغلا يبقى وكانه غاب زادي
عند هقواته نكون بكل حزه
مانقابل من نعزه باالتمادي
مروي السديري
نركض ورا الدنيا نبي نلحق الغيم
واعمارنا عند الكريم محسوبه
حتى بياض الوضح غطى المجاهيم
وحنا من الغفله نسينا العقوبه
سوات الأطرش في زحام المعازيم
اللي ضحك بوجيه من هم حكوبه
لين اختلفنا في كثير المفاهيم
ياالله حسن الخاتمه والمثوبه
مروي السديري
رح واعتبرني مثل مرّار الطريق
اللي ماحصل ف المدينه راحته
ماعلموك ان الشمالي مايضيق
يضحك ولو نصف الهموم اجتاحته
دايم على الهقوه مثل قمة طويق
خذ درس من طيبه ومن سماحته
رح واعتبر من موقف الحر الطليق
واللي يبي درب الغياب براحته
مروي السديري
الناس فيها الراس والخشم والذيل
مثل الاصابع بين قاصر وطايل
اشره على الطيب لياعدو القيل
لو هو من ابعاد العرب والقبايل
الطيب فطره عند بعض الرجاجيل
شف حكمة الله بااختلاف الفصايل
ناسٍ فصيلة دمها تشبه الليل
وناسٍ خلقها الله لعشق الجمايل
مروي السديري
أتغيشم بعض الاحيان في وجه الغشيم
وأتخيبل بعض الاحيان قدام الخبل
ماتعبنا من مواجيب وحقوق الحشيم
منزله لاحدّه الوقت في قمة جبل
البلاء اللي داخله شين والمظهر وسيم
كل ماترخي معه قام في شد الحبل
عزتي والله لياضاق صدرك ياالحليم
مالك الا الصبر والصمت في كل السبل
مروي السديري
العام بعيوني مثل قمة طويق
واليوم عادي في عيوني ولاشي
من لايقدر بالحياة المواثيق
محاسن الميت يسولف بها الحي
ماتقبل الزله نفوس المطاليق
لو كان فيها شي ماتشتكي شي
وان جف من كثر الضما البوح والريق
ترحل ولو. هي كانت بحاجة المي
مروي السديري
لا صار بعض الصمت خير من الكلام
كثر الكلام احيان مابه فايده
��كفي عن كبار المشاريه السلام
وألا.. بيوم العيد كرت معايده
من لاوقف جبنك مع الصف الامام
اعرف ترى دلة قهوته صايده
مافيه داعي في غياب الأ هتمام
تعطي هل الصده مكانه زايده
مروي السديري
الوقت مثل العمله اللي بوجهين
يضحك لنا لاكنه احيان غادر
من حظي الطيب ومن فالك الشين
شفني رحلت وعنك بكره مغادر
ماعاد تلقى للمسافر عناوين
راح وقفل خدمة جميع المصادر
على كثر مال القوافي محبين
باالقلب والجوال وارد وصادر
الا اني اعشق واحترم منهم اثنين
الواثق ومن باالمواصل يبادر
الخطوط الحمر مكه والمدينه
والعقيده والمواطن والحكومه
من طعنا باالظهر تبت يدينه
لعنة الله تشمل المفتن وقومه
والله انا كل شيٍ فاهمينه
باالعدو من قبل لاتظهر علومه
الملك سلمان ومحمد يمينه
اركدي يازمرة ابليس اللعينه
نعرف الوافين من حسن التعامل
ونتعامل باالمثل في مستواها
ماسرق بوح الوفي غير المجامل
والقلوب البيض ماتترك وفاها
من يشوف انه ولد مخلوق كامل
ذاك جاهل لو يكابر ويتباهى
واثق الخطوه ملك لو كان عامل
والنفوس اغلب مطامعها بلاها
ديوان للواجب وشوفه يريحك
للضيف والعاني وللجار راحه
راعيه بالترحيب والطيب ينطحك
بيت الكرم ماهو بكبر المساحه
عد الرجال اهل الكرم من مرابحك
هذا الصحيح ان كان تبغى الصراحه
رجلٍ ولو طول غيابك يسامحك
ورجلٍ لسانه في غيابك سلاحه
وديوان فيه تحصل المزح والضحك
وديوان لااصحاب الدوام
الطيب لاتستغربه من هل الطيب
للنوم عشاقه وللمجد ناسه
اشره على اللي يدركون المواجيب
وكلٍ على جسمه يفصل مقاسه
والذيب يبقى مع مرور الزمن ذيب
تعجبك هداته وعزمه وباسه
ومن لاظهر صيته قبل يطلع الشيب
مثل الذي راحت عليه الدراسه
مروي السديري
من عطيته فوق قدره ولاقدر غلاك
اعرف انك لو تعزه مصيرك تخسره
لو يكون لقلبك النبض وبعينك ملاك
ولو مكانه باايمن الصدر والا باايسره
لاتعاتب من تغير ومن غاب ونساك
كيف تعدل ضلعٍ اعوج وغيرك يكسره
لاتحاول تكسب ارضاه من راح وجفاك
لاتضايق طالما العسر بعده مسيره
مروي السديري
العيد تفرح به وجيه المطاليق
اللي لوصل اهل المواجيب تشتاق
بين القلوب البيض عهد ومواثيق
يشبه علاج القلب والصدر لاضاق
اهل المواقف شوفهم يطرد الضيق
للنوم عشاقه وللوصل عشاق
مثل الشعور اللي مايحتاج تنسيق
اللي تغذيه المشاعر والاشواق
محبة الوافين حظ وتوافيق
دام العمر محدود
اغلى ضيوف الشتاء بعد الغياب السحاب
الارض تشتاق له والناس تشتاق له
لاجاب صوت المطر طاري لبعض الغياب
مشاعر اهل الهوى في صمت تنساق له
مصيبة الشوق مع صوت المطر والضباب
يأخذك للي فقدته وانت مشتاق له
الملح لاذاب مثل السكر ان كان ذاب
دام الوله جاهله يضحك على عاقله
مروي السديري
رحلت يامشعل وسطرت الدروس
سيرة بطل عبره ومنها نستفيد
وقفت للحوثي وحطمت المجوس
يمناك ماترجف مثل قلبك حديد
كم طاح من يمناك ياابن العم روس
باالمعركه جتنا علومك ياالعنيد
فداك عبّاد المظاهر والفلوس
دون الوطن من مات يامشعل شهيد
#استشهاد_مشعل_طريد_العنزي
حرارة الجو محتاجه لبعض الصبر
وايامنا كلها مثل العمر رايحه
اسبوع فيها كسر واسبوع فيها جبر
ماهو بدايم تكون نفوسنا سايحه
هذي فصول السنه تمرنا وتعبّر
من شدة الحر شف روس النخل طايحه
مفروض نأخذ من الدنيا دروس وعبر
وعلى وداع اصعب الايااااام باالجايحه
مروي السديري
احيان من بعض المجامل ملامحك
تكشفك لو تضحك وكنّك براحه
احرص على اللي باالتراحيب ينّطحك
بيت الكرم ماهو بكبر المساحه
ديوان للواجب وديوان للضحك
وديوان لااصحاب الدوام استراحه
طلق الحجاج وخوّته من مرابحك
هذا الصحيح ان كان تبغى الصراحه
مروي السديري
اضحك وخل اللي بجنبك يضحكون
اضحك بوجه الفقر وبوجه الحياة
الضعف ماينفع ولا دمع العيون
دنياك خذ منها القناعه والثبات
حتى يحس ويستحي من يشتكون
المشكله كان الضمير الحي مات
واترك سبيل اللي شباع ويركضون
ومن يجهلون الباقيات الصالحات
مروي السديري
انا اشهد شهادة حق ياالصمت بعض احيان
من اكبر نعم ربي وفضله على ناسه
اذا تجهل كحيلان عط فرصه كحيلان
من البوح تعرف ما بصدره وفي راسه
ماهو شرط ولد فلان يطلع لبوه فلان
ولو كان باالديوان بالصدر مجلاسه
يقولون مضمون الكتابه من العنوان
وانا اقول بعض الناس محتاج لسياسه
مروي السديري
يارب بارك لنا في عشر ذو الحجه
ايام فيها القسم والفوز والرحمه
واقبل سعي من نوى للبيت متوجه
الحج صوره تجسد موعد اللحمه
ياحظ الانسان في سعيه وفي حجه
ايام ونشوف كيف الناس مزدحمه
يالله من يستغيث برحمتك نجه
رضاك قبل السفر والبعد والزحمه
مروي السديري
الطيب ماله دار وبلاد وحدود
راعيه طير بكل ديره يحومي
طير السعد يقدم لو الدرب مسدود
فطره من الله للمعالي يرومي
الفقر مارد النشاما عن الجود
والمال ماكبّر مقام الرخومي
اهل الكرم تبقى مواقفهم شهود
واهل البخل تجهل بكل السلومي
والآدمي عمره ولو طال محدود
العمر رحله والمنايا سهومي
ناسٍ نجي حالاتها ونتعدى
كلامها عابر وتحصيل حاصل
ياليتها ترقد بعد ماتغدى
وتأخذ عن الجوال والناس فاصل
وناسٍ بحالتها الكثير يتقدى
نحكم عليها من خلال التواصل
الواثق بكل الامور يتحدى
لو مانعرفه طيب العلم ياصل
مروي السديري
شعور الحنين اللي بنا للوطن فطره
نسافر ويرجعنا الوله وين ماكنا
وطنا شموخ العز والسيره العطره
غلاته مادام أنا على الأرض تسكنا
نغي�� الكبود اللي من الحقد منفطره
ولا همنا من بينت غيرته منا
وطن من شرب من ماه حبه مثل عطره
على العهد نبقى خبر اللي سأل عنا
كلنا دون الوطن ايوالله انا دونه
مانساوم في عقيدتنا وفي موطنا
الشجر من قوة جذوره تعيش غصونه
والوطن نبض القلوب ومثل قطعه منا
كلنا دونه وتبقى ارواحنا مرهونه
يكفي انا فيه من بعد الكريم آمنا
دام اخو نوره بخير بلادنا مأمونه
مملكتنا ماتهوووون ودونها ماهنا
مروي السديري
أتلى العهد فيه يوم انه يقول انت وين
واقول له عند عينك فاقدك وينك انت
ويرجع يعّيد السؤال المشكله مرتين
ويسكت لاياقلت له بعدالبطا وين كنت
صوته قبل لايغادر كان مررره حزين
حتى وهو مختفي في قيمته مااستهنت
من بعدها وين مدري(غيبتّه السنين)
عليه لولا المعزه والوفاء ماحزنت
مروي السديري